في البداية كل سنة والفرحه جواكم يارب 
كام حد فينا مش في حد اتكلم عليه او اتسببله في مشاكل
اعتقد الجميع
رمضان بحس انه التربية الدينية المباشرة من ربنا لينا بدون اي وسيط .. العبد وربه .. بدون شيخ .. بدون داعي
في بعض الايات لما تركز فيها اوي تدمع من عظمتها وقوتها
قال تعالى : " الذين ينفقون في السراء والضراء والكاظمين الغيظ والعافين عن الناس والله يحب المحسنين"
وانا نفسي ربنا يحبنى وعشان كدا هعمل اي حاجه ربنا بيحبها عشان يحبنى
العافين عن الناس : لما قراتها سالت نفسي كام حد مر عليا وظلمنى او اتكلم عليا ( اغتابنى – نم عليا ) اكيد كتير .. طيب في خلال حياتي في ناس انا اعرفهم واعرف هما عملو ايه وفي ناس اغتابتنى وانا اصلا مش اعرفهم … صح
طيب انا اقدر اعفو بسماحه متناهيه عن اللي انا مش عارفه عنهم حاجه واغتابونى لمجرد انهم يسلو وقتهم
طيب واللي انا اعرفهم هل فعلا هقدر اعفو
فكرت ولقتني قسمتهم لاتنين .. ناس ظلمهم كان هين واقدر اسامح لهم من كل قلبي
طيب والناس اللي ظلمتني جدا وضيعت منى حاجات حلوه جوايا وبدلتها بحاجات انا مش حباها فيا لانها مش من شخصيتى لانها خلت فيا قناع يظهر .. خلت فيا جزء خايف من الناس .
هل هقدر اسامحهم ؟ أه هقدر اسامح
لاني بحب ربنا اكتر منهم لان ربنا عوضني عن ظلمهم كتير كتير جدا
لانى بحب نفسي .. ومش احب نفسي تكون شايله من حد او نفسها تاخد حقها من حد
فقررت اني اعلن دا
ومن صميم صميم قلبي بجد
ان اي حد اساء ليا بجد مهما كانت اساءته انا مسمحاه جدا وبحله كمان من الاساءة دى
اللهم أيما عبد أو أمة من أمة محمد صلى الله عليه وسلم اغتابني أو ظلمني أو بهتني أو قذفني أو قال في ما ليس في فإني قد عفوت عنه وتركتها له
يارب رمضان تكون بداية جديدة ليا وصفحه بيضا للجميع
اللهم انك عفو كريم تحب العفو فاعفو عنا يالله
